 |
طب انا حامل في توأم ومش قادرة وعلى آخري إنتي بقي
إيه عذرك؟
- زي ما إنتي حامل وتعبانة، أنا كمان حامل وصايمة وشايلة البيت كله..
- بس أنا غيرك يا حبيبتي، أنا الدكتور هو اللي مانعني وعشان كده بفطر.. ومش هتحرك ولا هعمل حاجة عشان ما آذيش نفسي
- يعني إنتي عاوزاني أخدمك وأنا صايمة وحامل وإنتي اللي فاطرة مش راضية تقومي تساعدي في حاجة؟ يا برودك يا سمية..
___________________________
أنا راندا، عندي 25 سنة متجوزة في بيت عيلة بقالي سنتين ورمضان السنة دي دخل علينا أنا وسلفتي وإحنا الإتنين حوامل ، لكن سمية سلفتي كانت عايزة تهرب من هم الصيام والعزومات اللي حماتي بتعملها كل شوية، إشي تعزم نسايب بناتها وإشي إخواتها ده غير الجيران اللي بتجاملهم على حِسّنا.. وطالعين نازلين باطباق وحلل من عندنا
وطبعًا عشان سمية كانت في الخامس وحامل في توأم، قالت لحماتى إنها مش هتستحمل لا شغل ولا مرمطة، وإنها هتفطر عشان مش هتستحمل صيام وفرهدة في الحر مع تعب الحمل..
ورغم إن أنا كمان حامل في التالت ، إلا إنهم مكانوش واخدين بالهم إن أنا كمان محتاجة راحة، وكانت حماتي تصحيني وتقولي قومي فزى إعملي فطار لسلفتك عشان تاخد دواها.
ولا هتفضلى نايمة للمغرب و تضيعى صيامك
مكنتش عارفة هي بتتعامل بأنهي منطق، ولا أنا عشان بصوم وأنا حامل زيي زيها يبقى خلاص مش حاسة بتعب ولا نفسي أرتاح.
ومن أول أسبوع حماتي كل يوم تعزم عيلة شكل، وألاقي سمية تيجي بعد ما تفطر الظهر وأحطلها الأكل قدامها، تروح عند حماتي وتقولها إنها تعبت وحاسة بدوخة، و هاطلع شقتى عشان اريح جسمى شوية .. وكانت تنزل زي الهوانم قبل المغرب بدقايق.. وكنت انا بطق من جنابى من عمايله
واقول اشمعنى انا منا متنيلة حامل اهو زيها و لا عشان هما عرفوا انها هتجيب ولدين طالعين بيها السما ؟!
فضلت فترة طلعان عيني في تنضيف الشقة عشان الناس اللي جاية ما تقولش علينا حاجة، ده غير الطبخ اللي بفضل أطبخه من ساعة ما بصحى من النوم لحد الفطار، وطبعًا كوم المواعين اللي بيفضل محدش بيعمله غيري..
و فى يوم لقيتها صاحيه بدرى و قعدة جنب سلفى التانى يايسن وعماله تاكل بواقى السحور غمزتلها عشان تقوم و تتكسف على دمها .. قالتلى بكل بجاحة والنبى يا قلبى ناولنى ميه بسرعة هزور .. قلتلها فى سرى تزورى ولا تفطسى حتى انا شغالة عند اللى جابوكى .. صحيح اللى اختشوا ماتوا
كانت عمالة تاكل ولا اللى داخل على مجاعة
ولا مكسوفة ولا اتخجلت من اخو جوزها
ولقيتنى بقولها وانا هنفجر من طريقتها ياختى انتى هاتك يا اكل ولا مراعية اننا صايمين ولا مختشية من سلفك
ردت بكل تناحة و قالتلى قصدك ياسين وراحت ضاحكه بسخافة و قالت يا بت ده اخويا الصغير ومننا و علينا
قالتلى يلا بقى اجرى كده اتحركى و هاتيلى اشرب من التلاجة
قلتلها بعلو صوتى والله ما فى تلاجة غيرك يا بعيده و رحت فعلا جبت ماية وعملت انها وقعت منى بدون قصد عليها وغرقتها قامت تفط و تنط زى العفاريت ولا كأنها حامل و قلتلها ببرود معلش يا سلفتى تعيشى و تاخدى غيرها و طلعت على شقتى
كنت وقتها جبت أخري والكل مش حاسس بيا ولا بتعبي..
ولما جوزي طلع بالليل بعد ما اتسحر مع إخواته قلتله/
- بص بقا يا حسن، أنا مش هقدر كل يوم أنزل وأعمل شغل البيت كله ومرات أخوك زي الهانم شايلة إيديها من كل حاجة.
- إيه بس يا راندا، إيه اللي مزعلك؟
- اللي مزعلني يا اخويا إن محدش حاسس بيا، وإن مرات أخوك زودتها أوي، ده إنتوا لو قاصدين تحرقوا دمي مش هتعملوا كده.
- يا حبيبتي بس هي حامل وتعبانة
- سلامة نظرك يا حبيبي، وأنا إيه؟ طالعلي كرش؟ ولا حاطة مخدة ؟؟ ما أنا حامل زيها وربنا وحده اللي حاسس بيا وبتعبي.
- مش قصدي يا راندا، أقصد إنها مش بتعمل حاجة عشان الدكتور هو اللي قالها. لكن انتى ما شاء الله صحتك زى الفل و الحمل مش تاعبك وبعدين يعني لو إنتي معملتيش ده مين اللي هيعمل.
- أيوااااا، قول كده بقى .. طب بص يا حبيبى من هنا و رايح تشوف حد غيري يتبهدل البهدلة دي، وإلا هتلاقيني على آخر الشهر بولد من اللي بيحصل فيا ده ..
- طيب ما تضايقيش نفسك و اهدى ، أنا من بكرة هشوف حد ييجي يساعد في البيت
تاني يوم صحيت براحتي لكن لقيت حماتي وسلفتي قاعدين وبيتكلموا وساعة لما شافوني بطلوا كلام، كإنهم كانوا بيتكلموا عليا، او بيتفقوا على حاجة مش فهماها وقامت سمية من مكانها أول ما شافتني وقالت لحماتي:
"عن إذنك بقا يا ماما أما أطلع شقتي أحسن بدأت أتعب.."
قلتلها:
"جرا إيه يا سمية، هو إنتي ساعة ما شفتي وشي جاية تقومي و تعملى نفسك تعبانة
ردت وقالت وأنا مش فاهمة!
- طب أنا حامل في توأم ومش قادرة وعلى آخري إنتي بقى إيه عذرك؟
- زي ما إنتي حامل وتعبانة، أنا كمان حامل وصايمة وشايلة البيت كله..
- بس أنا غيرك يا حبيبتي، أنا الدكتور هو اللي مانعني وعشان كده بفطر .. ومش هتحرك ولا هعمل حاجة عشان ما آذيش نفسي
- يعني إنتي عايزاني أخدمك وأنا صايمة وحامل وإنتي اللي فاطرة مش راضية تقومي تساعدي في حاجة؟ يا برودك يا جبلة انتى .. طب من هنا و رايح بقى تشوفى خدامة غيرى يا نن عين ماما
مردتش عليا وبصتلي بقرف من فوق لتحت و كانت قاعدة بتاكل يجى نص صنية مكرونة بشاميل و كملت عليها لاخرها .. كنت ببصلها وانا مستغربة و بولع من جوايا من حركاتها بس مسكتش استنيت لحد ما طلعت شقتها
و قعدت مع لحماتى و قلتلها :
راندا - فى إيه يا أم حسن جرا ايه يا ام جوزى ؟
حماتها - بقى إنتي بتقومي حسن وبتقوليله إننا مش حاسين بيكي ومستكترة أوي اللقمة اللي بتعمليها لأهل الدار؟
راندا - يا ماما إفهميني بس ، أنا عمري ما اشتكيت وعلى إيدك كل حاجة في البيت أنا اللي بعملها، لكن لما ألاقي المعاملة مختلفة بيني وبين سمية يبقى لازم أتغير طبعاً.. ولو على الفطار فأنا مش مضايقة منه، وأهو نيتي إني أكسب ثواب إفطار صائم. لكن البهدلة دي كلها وأنا حامل، ومحدش بيقولي شكرا، ولما تيجي سمية تشيل كوباية من مكانها يبقى الدنيا هتنهد وتقولولها إرتاحي.
حماتها - يا بنتي أنا عارفة إنك شايلة البيت، بس سلفتك هي كمان حامل والدكتور قال إن الشغل والصيام خطر عليها.
راندا - تقوم تقضى على الاخضر و اليابس بالطريقة دى .. دى بتاكل ليل نهار كأنه اخر زادها
حماتها - قولى ما شاء الله يا راندا و خفى غيرة شوية يا بنتى
راندا . مفيش فايدة، كل ما كنت أنطق مع حد فيهم، يقولولي الدكتور محرج عليها، كإني بأنده في مالطا..
قمت طلعت على شقتى و بعدها بكام يوم حسن جوزي جابلي واحدة ست تساعدني في شغل البيت، إلا إني بدأت أحس إني تعبانة.. ومكنتش حتى بقدر أنزل السلم وأطلعه كل شوية.. و دخلت فى شهور التعب فعلا
كلهم فكروا إني زعلانة، وإني بأدعي المرض عشان موضوع سمية وغيرانة منها..
وكتر خيرها الست اللي حسن جابهالي.. كانت لما تشوفني بعمل حاجة تقولي خلي عنك إنتي يا بنتي..
أم حمدي الوحيدة اللي كانت واخدة بالها إني تعبانة بجد .. مش بدلع و انى مش بعمل كده عشان أغيظ سمية زي ما هما فاكرين..
وقبل الفطار ب 5 دقايق، وأنا بحول الإطباق على السفرة محستش بنفسي.. ووقعت من طولي والدنيا كانت بتلف بيا..
فقت لقيت نفسي في سريري.. وحماتي وجوزي وسمية وجوزها وأم حمدي كانوا واقفين كلهم حواليا.. وقالقنين عليا
جابولي دكتور قريبنا وكشف عليا، وبعدها قالي:
- يا مدام رندا إنتي كنتي صايمة مش كده؟
- أيوة يا دكتور..
- طيب وفيه واحدة برده عندها أنيميا وكمان حامل وتصوم وفوق كل ده تفضل رايحة جاية وما تريحش نفسها؟ ده اللي عنده صداع بيرتاح في الصيام عشان ما يتعبش ويقدر يكمل صوم..
بصيتلهم وأنا ساكتة، وبعدها الدكتور كلم حسن جوزي وقاله:
- بص يا حسن، دلوقت إحنا داخلين على آخر شهرين في الحمل، فلازم مدام راندا تفطر، ولازم راحة عشان للأسف صحتها اتأثرت بالصيام وكمان لو فضلت مكملة على كده احتمال يبقى فيه خطورة على الطفل..
كلنا استغربنا لما لقينا سمية هي كمان دخلت في الحوار وقالت للدكتور:
- طب وأنا يا دكتور؟ أنا برده كنت حاسة بضغطي واطي وحامل في توأم..
رد الدكتور عليها وقالها:
"مفيش مشكلة، هقيسلك الضغط ونشوف حالتك، لكن هنحتاج نعمل تحاليل.."
ردت بسرعة وقالتله:
"أنا لسه عاملة التحاليل من يومين والدكتور قالي برده ما أصومش وأفطر عادي وما أشيلش حاجة تقيلة.."
كانت عايزة الكل يبصلها هي بأي طريقة، وتنسيهم في ثانية إن أنا اللي تعبانة مش هي..
لكن سبحان الله، أول ما الدكتور قاسلها الضغط، وبص على تحاليلها قالها:
- التحاليل كويسة جدًا يا مدام سمية.. بس محتاجين نخلي بالنا من أكلنا شوية
- أنا فعلا يا دكتور مباكلش كويس الفترة الأخيرة.
- لأ يا مدام.. انا أقصد نقلل الأكل شوية، لإن الوزن زايد بدرجة كبيرة، ولازم تتحركي برده.. وعلى فكرة مفيش أي مانع تصومي.. لإن مفيش خطورة عليكي من الصيام ولا على الحمل..
- بس أنا يا دكتور بدوخ وبحس إني مش قادرة أصوم..
- والله دي بقا حاجة تانية ممكن تكون نفسية.. لكن التحاليل اللي قدامي بتقول إنك ما شاء الله زي الفل، هنحتاج بس نتحرك شوية عشان القعدة الكتير غلط
اتكتمت سمية.. الظاهر كانت عايزة الدكتور يقولها ما تقومش من السرير عشان ترتاح وتهرب من شغل البيت..
حماتي أول ما سمعت كلام الدكتور قالتلي:
- سامحيني يا راندا يا بنتي.. بس إنتي لا كنتي بتشتكي ولا باين عليكي، حقك عليا بس أنا مبعرفش أعتمد على حد تاني غيرك..
وأول ما سمية شافت حماتي وجوزي خايفين عليا، جرت جوزها وراها وطلعت شقتها..
نزلت عشان أحضر السحور زي العادة. حماتي قالتلي إقعدي ما تعمليش حاجة..
ونزلت سمية لقت أم حمدي واقفة بتعمل الأكل.. ولسه هتقعد جات حماتي و راحت قايلالها: "مشي رجلك شوية يا سمية لحد أم حمدي وحضري معاها السفرة دانتى خلاص فى اول التاسع ولازم حركة
سمية مسكت ضهرها، ومقدرتش تتكلم زي كل مرة وتقول تعبانة والدكتور قال ومقالش.. ما كلنا سمعناه وهو بيقولها إنها زي الفل..
وساعة السحور لقينا حسن جوزي بيهزر على الموضوع وبيقول لسمية:
صحيح يا سمية، إنتي دكتور مين ده اللي قالك تفطري؟
ردت وقالتله:
- الدكتور اللي بتابع معاه
- هو مش إنتي وراندا بتتابعوا مع دكتور واحد؟
- جرا إيه يا حسن فى إيه أديني هصوم بكرة ارتحتوا؟
ردت حماتي وقالتلها:
- ابقي عوضي بقا اللي فاتك يا سمية، أحسن ده وزر كبير الصيام من غير عذر.
- أنا كنت بفطر بعذر يا حماتي، وكنت تعبانة ومش مستحملة الصيام وكفاية انى حامل و فى تؤام كمان يعنى محتاجين اكل وغذا كويس
- والله يا بنتي ده بينك وبين ربنا.. بس اللي أعرفه إن اللي يفطر يوم من غير سبب يبقى لازم يقضيه ، أديكي شوفتي راندا كانت تعبانة أهي وبتصوم.. إنما انتي فطرتي أسبوع ولا 10 إيام كده من غير سبب.. لازم تعوضيهم وتستغفري
- قصدك إيه يا حماتي، يعني أنا كنت بكذب عليكم؟
وطبعًا سمية ما استحملتش الكلام، والكل بقى يشوفها ويكتم الضحكة، صحيح سمية كويسة لكن دايمًا تتمارض.. وخصوصًا في رمضان ما كانت بتصدق تفطر وحكاية الحمل دي جاتلها على الطبطاب..
لكن للأسف بنبقى فاكرين إننا كده ريحنا نفسنا من هم الصيام زي ما سمية عملت.. وأنا لما جيت أفطر بعد كلام الدكتور حسيت كإني بعمل حاجة غلط، لإني عارفة أهمية الصيام كويس وأد إيه هو عبادة كبيرة وعظيمة عند ربنا..
ومرت ايام وجه طلق سمية ليلة العيد ولاجل الحظ انى جالى الطلق فى الشهر السابع و احنا الاتنين ولدنا مع بعض لكن للاسف يوم الولاده حصلت الكارثة اللى محدش ممكن يتخيلها وهى ان سمية ماتوا ولادها فى بطنها نتيجة تخمة من كتر الاكل والقعدة و انا لاقيت الكل جاى يباركلى انى جبت تؤام .. وقتها قلت فى سرى اللهم لا شماتة بس فعلا ربنا مش بيضيع اجر حد
الرسول صلى الله عليه وسلم قال : كل عمل ابن آدم له إلا الصيام؛ فإنه لي وأنا أجزي به، والصيام جنّة، وإذا كان يوم صوم أحدكم فلا يرفث، ولا يصخب، فإن سابّه أحد أو قاتله فليقل: إني امرؤ صائم، والذي نفس محمد بيده لخلوف فم الصائم أطيب عند الله من ريح المسك، للصائم فرحتان يفرحهما: إذا أفطر فرح، وإذا لقي ربه فرح بصومه)
يعني الصيام اللي ساعات فيه ناس ببتحجج عشان ما تعملوش هو أكتر عبادة ربنا بيحبها.. وبيحب الإنسان يجاهد نفسه عشان يعملها
يا ترى انتوا شايفين ايه .. هل فعلا سمية كانت صح لما لما كانت بتعمل تمثيلية عشان تفطر؟
و دلوقت هى حزينة جدا على اللى حصلها و حماتى بعد ما كانت بتدلعها هى .. بقيت بتدلعنى انا و الشغل بقى كله عليها لوحدها .. ياترى تفتكروا اسيبها تشتغل وتدوق شوية من اللى دوقتهولى ولا أساعدها زى ما كنت بعمل قبل كده؟
رغم انها صعبانة عليا اوى وكل ما تمسك عيالى او تشيلهم تفضل تعيط وتقولى يا بختك يا راندا فزتى بالصيام والأجر و ربنا عوضك بكل خير ياريتنى كنت عاملت زيك يا حبيبتى
ابصلها بحزن و اقولها بكرة ربنا يعوضك بكل خير يا قلبى
وهتجيبى احلى تؤام ان شاء الله وكمان يا هبلة ما عيالى هما عيالك بردو ولا ايه؟! بس انتى حاولى تصومى اللى عليكى ومتكسليش تانى
قالتلى حرمت و توبت خلاص .. الفطار للعذر و الضرورة فقط
بصيتلها وخدتها بالحضن وعينيا عماله تطمنها ان ربنا ان شاء الله هيعوضها
وانتوا كمان ادعولها وادعوا لكل مشتاق ربنا يرزقه بالذرية الصالحة يااااارب
تعليقات
إرسال تعليق