قصه شيقة وممتعة....كيد الحموات وانتقام الزوجات
- هو ده فرح بنات الحاج عبدالجواد بجد ولا فوتوشوب ؟؟
= اه يا اختى هو بعينه .. شوفتى الاملة اللى هما بقوا فيها
- طب قولى ماشاءالله .. وخليهم يفرحولهم يومين .. دول ياما شافوا تعب و شقى و حرمان من صغرهم
= اه ومالو .. ما هما يفرحوا وينبسطوا و يتجوزوا .. و انا بنتى بقى عندها ٢٩ سنة ولسه مرزوعة جنبى
- شوف الست وكلامها .. ياعطيات ده نصيب ومحدش بياخد غير رزقه
= لا لا دول اكيد سحرينلهم ولا عاملينلهم حاجة كده ولا كده .. مش معقولة التلاتة يقعوا واقفين ... شبكة فخمة و فرح اوبهة و جوازات مفيش بعد كده
- ياساتر يارب من عينيها .. ربنا يعدى الليلة دى على خير .. قل اعوذ برب الفلق
ـــــــــــــــــــــــــــــــــــ
الراوي:
من 25 سنة وفي ليلة كلها مطر وبرق ورعد،
ولدت هنية 3 بنات في بطن واحدة، شهيرة و بهيرة واميرة
لكن للاسف ماتت هنية في نفس يوم ولادتهم .. و ملاحقتش تشوفهم ..
وقبل ما تموت كان على لسانها دعوة واحدة لبناتها
فضلت تقول: "يارب نوّل بناتي اللي يتمنوه، واحميهم من شر الدنيا."
ودعوتها استجابت وقتها فعلا لكن اتحققت بعد سنين طويلة..
فاتت السنين والبنات كبرت، وبقوا يحلموا ييجي اليوم اللي دعوة أمهم تتحقق فيه، ويخلصوا من العيشة اللي كانوا عايشين فيها .. فقر، و تعب ، وحرمان..
خصوصًا بعد ما أبوهم قابل وجه كريم وهما فى اعدادية يعنى مكنوش كملوا ١٤ سنة .. سابهم في الدنيا لوحدهم ..
ورغم إنهم كانوا 3 توائم إلا إن أميرة وبهيرة وشهيرة، كانت شخصياتهم مختلفة تماما وحتى شكلهم مكنوش شبة بعض ،
بعد ما خدوا الثانوية العامة شهيرة دخلت معهد فنون مسرحية لانها كانت بتحب التمثيل اوى .. لكن الحظ خلاها تشتغل بعد المعهد .. جرسونة فى مطعم كبير .. ومع ذلك مكنتش فاقدة الامل انها هتكون ممثلة مشهورة فى يوم من الايام ..
اما بهيرة دخلت كلية علوم و لما اتخرجت اشتغلت فى معمل تحاليل ... و اميرة كانت بتوتية و مش بتحب تخرج عشان كده خدتها من قصيرها بعد الثانوية بقت حياتها عبارة عن نوم و اكل و قراية القصص والروايات والافلام الرومانسية ...
كانت كل واحدة فيهم بتحلم بحلم غير التانية .. و فى يوم عيد ميلادهم ال ٢٥ اتجمعوا التلاتة و كل واحدة فيهم بدأت تحكى عن حلمها
أميرة
تعرفى يا بت يا شهيرة انتى وبهيرة .. انا بحلم بأيه ؟؟ بحلم اعيش عيشة الأميرات اه طبعا منا اسمى اميرة ، و اتجوز العريس اللي هيجيلى على الحصان الأبيض، ويخطف قلبى كده ، ويبقى رومانسي ويقولى كلام حلو و يعوضنى بقى عن سنين التعب و الشقا
بهيرة
يا اختى بلا نيلة هنعمل ايه برومانسيته يعنى لو مكنش حليوة كده و مقطقط .. الله بقى لو وسيم وعنده غمزات .. اموت انا و اعيد السنة ، نفسى كده يبهرهنى ويخلينى اقع في حبه من جماله ، . والناس لما يشوفونى ماشية جنبه يحسدونى على اللي انا فيه. .
شهيرة
خايبة انتى وهى وهتفضلوا طول عمركم خايبين .. رومانسية ايه وجمال مين .. هما الرومانسية والجمال بيفتحوا بيوت الايام دى ؟؟ هو فى احلى من الفلوس يا هبلة منك ليها .. نفسى كده واحد يشتريلى كل اللى اتحرمت منه زمان ... لبس و ميك أب و خروجات وعربيات ، و يخلينى اقب على وش الدنيا و اخرج من العيشة الفقر دى بقى .. نفسى كده ابقى شخصية مشهورة و معروفة و الناس كلهم يشاوروا عليا من بعيد ويقولوا الفنانة شهيرة .. نجمة وبطلة افلام الموسم و كل موسم .. ويفضلوا يرددوا اسمى و حكايتى ويتمنوا لو يتصوروا ولو صورة واحدة معايا ... يااااااه
الراوى
ووقتها، فضلوا التلاتة سهرانين يحلموا و يتمنوا وعملوا احتفال بسيط ولما جات الساعة 12 كل واحدة فيهم غمضت عينها واتمنت أمنية فى سرها و بعدها ناموا ..
وتاني يوم كإن المعجزة اتحققت، وكل واحدة نالت اللي كانت بتحلم بيه. فضلت أميرة في البيت، لإنها مكنتش بتحب الشغل ولا البهدلة،
واخواتها الإتنين نزلوا شغلهم بهيرة نزلت معمل التحاليل اللى بتشتغل فيه .. أما شهيرة فكانت رايحة تقدم في ستديو النجوم ولما لقت نفسها اتاخرت على شغالها .. سابت كل حاجة وهى مضايقة اوى ورجعت للشغل .. ماهو اكل العيش مر .. لكنها مكنتش تعرف ان شغلها ده هيكون سبب شهرتها
أول ما وصلت شهيرة وهى متلهوجة كالعادة عشان اتاخرت خبطت فى ترابيزة وهى ماشية كان قاعد عليها واحد .. وبسببها وقع كل اللى كان قصاده على الأرض .. بصلها بغيظ وقالها ايه القرف ده انا ناقص على الصبح توقعيلى قهوتى حرام عليكى دى اللى بظبط بيها دماغى ..
اول ما عنيها جت فى عنيه قالتله معقوله انت بشحمك ولحمك انا اسفة جدا وبكرر اسفى اسمحيلى اعملك بدالها حالا .. واول ما ياسين ركز فى شكل شهيرة وجمالها هدي خالص وموده اتغير وقال لالا ده واجب عليا انا اطلبلنا اتنين عصير يهدوا اعصاب الهانم ...
شهيرة ....
هههههه هانم مرة واحدة .. انا بشتغل هنا يا استاذ ياسين و جاية متاخرة ساعة .. عشان كده مكنتش شايفة ووقعت كل حاجة بسبب خوفى من المدير اللى بيحول مرتب الشهر كله لخصومات عشان تاخيرى ..
ياسين
اهااا قلتيلى بقى .. ولايهمك يا
شهيرة
اسمى شهيرة .. محسوبتك شهيرة ٢٥ سنة .. تصدق وتؤمن بايه والعشرة دول ... كنت هموت واقابلك وسبحان الله بعدها على طول ربنا حققلى امنيتك وشوفت المخرج ياسين الهوارى صاحب اكبر افلام انتاج فى السوق
ياسين
وياترى بقى كنتى عايزة تشوفينى ليه ..
شهيرة
بصراحة نفسى امثل اوى و للاسف ولا مرة جتلى الفرصة مع انى شايفة نفسى موهبة ويجي منى
ياسين
صحيح معاكى حق واحدة بجمالك وحلاوتك دول إزاي لحد دلوقت مخدتش دور بطولة في فيلم، ولا عملت ألبوم؟
شهيرة
كلك نظر يا ياسين بيه، أديك شايف البنات زي الرز إزاي وبيقدموا في كل مسابقة، وأنا حظي الحلو لسه مجاش. بس عمرى ما فقدت الامل
ياسين
مش يمكن يكون جه وانتي اللى لسه مش واخدة بالك منه؟
شهيرة
إزاي يعني ؟
ياسين
قوليلي يا شهيرة، نفسك في إيه؟
شهيرة
نفسي كل الناس تعرفني وأكون مشهورة، ونفسي يبقى عندي كل الحاجات اللي محتاجاها من لبس وشنط وبراندات..
ياسين
واللي يحققلك كل ده، وأكتر كمان هتقوليله إيه؟
شهيرة
ده أنا أعمل اللي يقولي عليه وأنا مغمضة.. وهيبقى جميله فوق راسى لباقى عمرى .. بس ده مين اللى هيبص لوحدة بتكمل عشاها نوم
ياسين
طيب يا ستي.. أنا عارف إني أكبر منك بشوية، بس عايزك تشيلي التكليف واعتبرينا اصحاب من دلوقت اتفقنا يا عسل
شهيرة
اتفقنا على ايه يا استاذ
ياسين
وبعدين معاكى بقى لسه قايلك بلاش تكليف بينا وتقوليلى استاذ
خلاص ولا تزعل نشيل التكليف خالص و اقولك ياسين و انت تقولى يا استاذة شهيرة
ياسين
ههههههه كمان فوق انك جميلة دمك عسل يا شربات
شهيرة
انا مضطرة اقوم بقى لان لو صاحب المحل لاحظ انى قعدت معاك ع الترابيزة و سيبت شغلى هيجى يكمل عليا ويخصملى باقى شهر
ياسين
وهو خصملك قبل كده ليه انتى بتقعدى مع زباين كتير ولا ايه
شهيرة
لا ابدا وحياتك .. بس بصحى افضل الف على الاستديوهات لحد ما رجعلى تورم و افتكر ان عندى شغل .. و اروحه متأخرة .. ونص الشهر بيضيع عليا خصومات بسبب كده
ياسين
طب مش هطول عليكى ياشهيرة ولو ان المفروض كانوا يسموكى جميلة مش شهيرة .. بصى يا ستى ... انتى بت نغشة ودمك خفيف، وأنا شفت فيكي النجمة اللي كنت بدور عليها لفيلمي الجديد، ومش بس كده .. أنا هدلعك وأخليكي بس تحلمي وتشاوري وأنا أحقق كل اللى نفسك فيه
قلتي إيه يا ست البنات؟
شهيرة
أنا مش مصدقة نفسي، أنا حاسة إني بحلم.. انت بجد يا عم انت ؟؟! طب وايه المقابل
ياسين
المقابل انك تستحقى كده فعلا انا اول ما لمحتك شوفت فيكى فنانة موهبة و كريزما عالية مش اى حد يمتلكها
شهيرة
لازم نتقابل بكرة، وهمضيكي على عقد الهنا والسعادة اللي هيبقى بداية شغلنا سوا، قلتي إيه؟
شهيرة
قلت موافقة طبعًا.. و مستنياك بكرة فى نفس المعاد بعد شغلى
______________________________
الراوى
وفي الناحية التانية كانت بهيرة بتقابل ادم لأول مرة لما استلم الشغل الجديد في المعمل .. ادم كان وسيم جدا وبيلبس كويس، وكان فيه كل حاجة بهيرة كان نفسها فيها.. إلا إنه مكنش واخد باله منها في البداية .. فاضطرت إنها تتشقلب عشان تخليه يلاحظها..
ادم
ممكن يا آنسة بهيرة تقوليلي نتيجة تحاليل الحالة دي طلعت إيه؟
بهيرة
طلعت قمر وعليها غمازات تهبل
ادم
نعم؟ إنتي بتقولي إيه؟
بهيرة
بقول لحضرتك النتايج قمر وتهبل.. مظبوطة يعني
ادم
أه.. طيب
ياريت تقولي لحد يعملى قهوة، ولو خلصتي شغلك تقدري تتفضلي
بهيرة
دانا لو أطول أبات في الشغل هعمل كده..
ادم
استاذة بهيرة .. تقدرى تتفضلى و الباب فى ايدك وانتى خارجة
_________________________
الراوى
ورجعوا البنتين للبيت، و كانت أميرة اختهم التالتة قاعدة كالعادة بتتفرج على التلفزيون وبتضحك، لحد ما اخواتها دخلوا وقعدوا يحكوا عن اللي حصل معاهم..
شهيرة
حزروا فزروا مين هتمضي عقد فيلم بكرة وهتبقى نجمة أد الدنيا
أميرة
ليه يعني طلعلك مصباح علاء الدين؟
بهيرة
سيبك منها يا شهيرة قوليلي إيه اللي حصل
شهيرة
قابلت المخرج ياسين الهوارى انما ايه حاجة كده مووز .. وعجبته اوى، وقالي إنه هياخدني معاه في الفيلم الجديد بتاعه
أميرة
تقصدى ياسين الهوارى بتاع فيلم .. حب فى التلاجة ؟!
شهيرة
ايوه يا مرمر هو
اميرة
ده شكله بجد ولا إيه، مبروك يا شوشو، أديكي يا ستي هتبقي مشهورة ولا حد هيعرف يكلمك
بهيرة
وأنا كمان يا بنات .. النهاردة قابلت الدكتور الجديد اللي جالنا المعمل، حاجة كده كريم كراميل على شانتيه .. الواد يخربيت جمال امه .. قمر اوى
أميرة
اشمعنه أنا يا ربي، يعني كل واحدة فيهم حلمها يتحقق فى نفس يوم ما يتمنوا ... وأنا اللي أفضل كده من غير ربع عريس حتى !
ضحكوا إخوات أميرة عليها، وقالولها ما إنتي لو بتطلعي من البيت وتتكرمي وتنزلي الشارع كان زمان حد شافك، أو انتي شفتي حد، لكن سموك مش راضية تنزلي لأرض الواقع.. ومستنية الأمير الغني اللي يجي يطلعك على الحصان المكسح
الراوى
وفضلوا البنات يتفرجوا على التلفزيون وهما بيضحكوا، مكنوش يعرفوا إن أحلامهم خلاص وصلت ارض الواقع والدنيا هتبدى تضحكلهم .. و كل ده بسبب استجابت دعوة ... فعلا حياتهم هتتغير للأبد.
_____________
الراوى
تاني يوم الصبح صحيت أميرة وجهزت نفسها عشان تنزل مع شهيرة و بهيرة .. كانوا مستغربين من نشاطها، وهما عمالين يبصولها باستغراب
قالتلهم
ايه ؟؟ فى ايه مالكم مبلمين كده ليه ؟؟. واحدة مخنوقة و زهقانه و عايزة تخرج تشم هوا شوية عشان نفسيتها زفت ، و لا هو الخروج حلو ليكم و حرام ع غيركم
بصولها بهيرة وشهيرة وهما بيضحكوا ..وقالوا اخرج يا جميل ع الساحة واتمخطر كده براحة
خرجت أميرة و هى متغاظة من تريقة اخواتها عليها .. وكانت ماشية قلقانة عشان دي أول مرة تخرج فيها للشارع من وقت طويل .. وهي ماشية و سرحانة فى حالها .. مخدتش بالها إن فى عربية ماشية بسرعة على الطريق، والعربية خبطتها ..
نزل ساهر من العربية بسرعة وهو قلقان ومخضوض على أميرة اللي صدمها بعربيته .. والناس في الشارع اتجمعوا ..
لكن أول ما شافها فضل باصص في عينيها كتير، وقالها:
ساهر
إنتي كويسة؟
أميرة
هبقى كويسة إزاي وإنت لسه خابطني، مش تفتح يا عم ولا انت البعيد اعمى !
ساهر
أنا آسف جدا ، أنا والله كنت واخد بالي، بس إنتي اللي ظهرتي فجأة .. تقريبا مكنتيش مركزة فى الطريق
عمومًا لازم أوديكي المستشفى وأطمن عليكي..
و اول ما أميرة ابتدت تفوق .. ركزت في ماركة العربية، وفي لبس ساهر و ريحة برفانه اللى تهبل.. بعدها ركبت الوش الحنين.. وقامت معاه وهي بتعرج رغم إن مكانش فيه أي حاجة بتوجعها ..
وقالتله بصوت كله دلع وسهوكة .. اااااه يا رجلى .. انا فعلا محتاجة اتعالج لان الخبطة وجعتنى اوى
فتحلها ساهر باب العربية بسرعة ، وركبت معاه، ووداها المستشفى.
وهناك فضل ساهر واقف مع الدكتور وبيسأله:
ساهر
طيب فى أي مضاعفات ممكن تحصل ولا هتبقى كويسة؟
الدكتور
مفيش أي حاجة، الآنسة كويسة وزي الفل
ساهر
طيب مش هتحتاج تعلق محلول أو تفضل في المستشفى؟ أصلها اتخضت جدا
الدكتورة
يا أستاذ بقولك خطيبتك كويسة، ولا تحب اخبطهالك تانى عشان تصدق انها بخير ... اكيد مش هخرجها لو هي تعبانة..
ساهر
متشكر جدا يا دكتور.. بس دى مش خطيبتى
الدكتور
هههه ماشى يا روميو
الراوى
كانت أميرة شايفة الحوار اللي بين ساهر والدكتور، وحست أد إيه هو خايف عليها وبيراعي مشاعرها وقلقان لا يكون جرالها حاجة بسببه ..
وكان فاضل شوية ويطلع من عينها قلوب وتغني: "هو ده اللي حلمت بيه، نظرته و ضحكة عينيه.."
ولولا إنهم في المستشفى كانوا طلبوا شجرة واتنين لمون..
وطبعا ساهر وصل اميرة لحد باب بيتها بعد ما خد رقم تليفونها عشان يطمن عليها
_______&___&&&&&________&
ادم كان في المعمل كان واقف وبيكلم حد وهو مضغوط،
وبهيرة دخلت المكتب عشان تسأله سؤال مهم، لكن حصل اللي مكنتش تتوقعه.. لما لاقته بيكلم مامته في التليفون وفجأة قالها وهو باصص لبهيرة:
يا ماما تاني؟ نفس الموضوع تاني؟ ما بتزهقيش يا حبيبتي؟
انا مش هتجوز خالص .. لان ببساطة مفيش واحدة تملى عينى .. ردت بهيرة فى سرها و قالت كتك ضربة فى معاميعك يا بعيد و متتجوزش ليه .. منا قمر اهو قصاد منك يا احول
ولما قفل مع مامته قعد مع بهيرة، وقالها: فى ايه خير يا بهيرة ... كنتى واقفة هنا ليه ؟؟ قالتله هاه .. لا ابدا كنت بقول يعنى ان الست الوالدة عندها حق .. بصلها باستغراب و قالها عندها حق فى ايه .. انتى كنتى رامية ودنك معانا ؟؟ قالتله لا لا خالص .. دنا صعب عليا حالها ومن حقها تفرح بيك بردو .. ضحك ادم لما اتاكد ان بهيرة حاسة بنفس مشاعره اللى هو كان مخبيها عنها ... و قالها وانا كمان بقول ان ماما معاها حق فعلا .. و دلوقت بس اتاكدت من كده .. بهيرة قالت بخجل مش فاهمة تقصد ايه .. قالها بصراحة كده .. أنا عارف إن أنا وانتي شغالين مع بعض بقالنا يدوب 10 أيام، لكن أنا كنت مراقبك كويس، وعيني مش بتتشال من عليكى ، وبصراحة اكتر .. أمي بقالها فتره بتزن عليا في موضوع الجواز ده ، وأنا مش لاقي أجمل و لا احلى ولا اطعم منك ، وحابب أتقدملك، قلتي إيه؟
الراوى
وزي ما كانت بهيرة هتموت على ادم طول الأيام اللي فاتت عشان وسامته هو كمان حبها عشان جمالها..
__________________
في الاستوديو كانت شهيرة قاعدة بتعيط، ودخل عليها ياسين وقالها:
زعلانة ليه يا شهيرة، دي حاجة بتحصل عادي، وبعدين فيها ايه يعني احنا لسه في البداية، وبكرة أخليكي نجمة الكل يحلف بحياتها.
ردت وقالتله: يعني مش هترجع في كلامك عشان يوم التصوير باظ؟ قالها: طبعًا لأ .. أنا مش هلاقي زيك تاني، وإنتي اللي هتبقي نجمة الفيلم الجاى بتاعى انا وعدتك وقد وعدى..
الراوى
وفضل ياسين يضّحك في شهيرة ويحاول يخرجها من الموود اللي هي فيه، وبعدها وهو بيوصلها لحد البيت بالليل، استغرب إنها عايشة في منطقة فقيرة زي دي .. بقى يبص للمنطقة بقرف واشمئزاز وفجأة قال
ياسين
شهيرة انتي ازاى عايشة هنا انتى اللى زيك لازم تعيش في مكان راقي يليق بيها
قالتله: منين يا اوس اوس هو اللي زيي مكتوبله يتهنى أبدًا؟
قالها: واللي يحققلك اللي نفسك فيه؟ ويخليكي ملكة متوجة؟
قالتله وهي بتضحك: وده هييجي منين ده؟
قالها: أنا قدامك، وعايز أتجوزك، ولو وافقتي هخليكي أشهر من النار على علم .. مش ده اللي بتحلمي بيه؟
قالتله وهي قلبها هيقف من الفرحة : بس سيبني أفكر شوية عشان انا اتصدمت دلوقت من ومش مصدقة نفسى ،هقول لاخواتي وهبقى ارد عليك..
____________________________
الراوى
وبعد شهر واحد .. اتعمل احلى فرح للتلات بنات وفرحهم كانت تشهد بيه الدنيا كلها .. واتعزم فيه اهل البلد كلهم وهما بيتحاكوا عليه .. وزى ما اتولدوا فى نفس اليوم .. كان من نصيبهم يتجوزوا بردو فى نفس اليوم .. لكن يا ترى احلامهم كده خلصت ولا لسه مستخبى لهم ايه مكنوش يعرفوه ؟!
تعالوا بينا نعرف سوا ايه المفاجآت اللى هتحصل فى بقية الأحداث
أميرة
ياااه ياربى اخيرا حققت حلمى بقيت مرات المخرج االمشهور اسامة الهوارى ،
شهيرة انا حاسة انى بحلم يابنات واحدة فيكم تقرصنى فى رجلى بسرعة خلونى اتاكدت ان اللى انا فيه ده حقيقة و و واقع عايشة فيه
بهيرة
يابركة دعاكى يامه .. ياما كان نفسى دلوقت تكونى موجودة انتى وابويا و تشوفى الاملة اللى بناتك صحيوا لقوا نفسهم فيها فجأة
الكوافيرة
مش يلا ياعرايس بقى .. عريسانكم مستنينكم برة عشان تاخرتوا على القاعة اوى
الراوى
ال 3 بنات نالوا اللي اتمنوه، وكل واحدة فيهم مكنتش الفرحة سايعاها.. لكن حياتهم الجديدة على قد ما تبان من برة منتهى السعادة الا ان لحد اول شهر من الجواز كان كل الامور معاهم تمام لحد ما الموضوع بدأ مع أميرة فى شهر العسل..
سافرت أميرة مع ساهر في شهر العسل، وحماتها وحماها سافروا معاهم عشان يغيروا جو..
اميرة
ايه ده يا ساهر انت مقولتليش يعنى ان مامتك وباباك حاجزوا فى نفس الفندق اللى احنا جايين فيه
ساهر
وايه يعنى يا حبيبتى هما كمان من نفسهم يجددوا حياتهم ويعملوا شهر عسل زينا
اميرة
ماشى من حقهم بس محبكش يعنى فى نفس الوقت اللى احنا بنقضى احلى ايام حياتنا فيه .. مش من اولها كده
ساهر
انتى اللى مش من اولها يا مرمر بطلى الغيرة دى وعديها بقى .. خليكى فريش كده .. ومتقفيش على الواحدة
اميرة
طب ماشى .. مش يلا بينا عشان نخرج بقى انا لبست اهو وجهزت نفسى
فتحت حمات اميرة الباب فجأة وقالتلها
"إيه ده يا أميرة؟ إنتي هتخرجي بالمنظر ده؟ مفيش حد هنا لابس اللبس اللي انتي لابساه ده،
اميرة
ايه ماله يا حماتى اللبس مش عاجبك ليه ده مايوه شرعى عشان نازلين البيسين
حمات اميرة
المايوه ده تلبيسه عندكم فى منطقتكم لكن هنا مينفعش .. شوفي أنا حماتك أهو ولابسة مايوه عادي، ما تبقيش متخلفة، وانسي بقى المكان اللي اتربيتي فيه ده مش برستيج خالص.."
اتصدمت أميرة من كلام حماتها، وبقت تبص لساهر اللي كانت فاكراه هيدافع عنها، ويخليها محافظة على حيائها وشكلها قصاد اى حد .. لكن أول ما قرب منها قالها وهو بيضحك:
"ايه المنظر ده يا ميرو صحيح .. ما تفكي كده ده إنتي عروسة وفي شهر العسل.. وبعدين أنا مقبلش مراتي تمشي معايا بالمنظر ده، وماما يا ستي هتبقى تعلمك تلبسي إزاي.. لازم تنسي اللبس القديم وطريقتك دي بقا .. لازم تعرفى انك اتنقلتى من مستوى لمستوى تانى خالص.."
وخرج ساهر هو وأمه، وقعدوا على البيسين، لكن أميرة كانت محتارة، وشافت جوزها وهو بيبص على الستات حواليه، قررت ترضيه وقلعت الحجاب، وكمان غيرت المايوه ولبست مايوه تاني مكشوف ومبين جمالها و حلاوتها..
وخرجت قعدت جنبه.. صحيح إنها كانت حاسة كإنها ماشية عريانة، والناس كلها بتتفرج عليها، لكن جوزها هو اللي كان حابب كده، وكان لازم تغير نفسها عشان تحافظ عليه وتعيش في مستواه..
كلمت أميرة أختها بهيرة عشان تطمن عليها وتشوفها، حكتلها بهيرة إنها مبسوطة أوي مع جوزها، وإن حماتها زي البلسم تتحط على الجرح يطيب .. و التلات بنات بقوا راسمين الفرحة و السعادة المزيفة على وشوشهم ... ووهموا بعض انهم عايشين حياة مفيش بعد كده
لكن الحقيقة كانت غير كده تماما ، من أول يوم في جواز بهيرة و ادم .. كانت ساكنة ام ادم و كانت بتدخل في كل حاجة بتحصل فى حياتهم.. ولما بهيرة كانت بتحلم بالراجل الوسيم نسيت تحلم إنه ما يكونش إبن أمه، وهي اللي ممشياه. مش بس كده..
ادم اللي عجب بهيرة عشان شكله وسامته، كان بتاع سوسو وتوتو.. وكل شوية مع واحدة شكل و بهيرة تقفشه بيكلم واحدة من وراها .. ، ولما كانت بتسأله دي مين، ومين اللي بتهزر معاك و واخدة عليك كده ليه .. كان بيطلعلها بألف حجة وحجة.. وفعلاً كان بيبهرها بحججه الغريبة. وطبعا كان فرحان بنفسه و وسامته اللى بتخلى بنات كتير تقع فى حبه بسهولة
وكله كوم ولما بنت خالته اتطلقت من جوزها كوم تاني..
اتصلت حماة بهيرة ببنت أختها، وقالتلها:
لازم يا حبيبتي تيجي تقعدي معايا لحد ما الفترة دي تعدي، وسيبك من جوزك ده خالص، ده ولا كان يطولك .. ولولا إن ادم إبني اتجوز، انا كنت جوزتهولك، ده إنتي بنتي اللي مخلفتهاش..
خرجت بهيرة مع ادم وقعدوا مع حماتها، وبعدها حماتها قالت:
"مريم بنت أختي جاية تقعد معانا يومين، عشان اتطلقت.."
رد ادم عليها وقالها: "أحسن حاجة .. أنا مش عارف هي رضيت بيه واتجوزته على إيه، ده أنا بكرة أشوفلها سيد سيده.."
استغربت بهيرة وقالتلهم: "تيجي فين؟ واشمعنه ما تروحش عند أمها؟ وبعدين البيت كفاية باللي فيه.." احنا بعددنا يدوب البيت مقضينا
ردت حماتها وقالت: "تيجي بيت خالتها يا عينيا، ولا هو فيه مانع حضرتك ؟ وبعدين اللي مش عاجبه يشرب من البحر" محدش له كلمة هنا عليا
الراوى
وبعد أيام جات مريم بنت خالة ادم وقعدت عند بهيرة، كانوا بيخلوها تنام ويطلع ادم هو وأمه ومريم فى الصالة ويفتحوا التلفزيون ويطلبوا أكل من بره ويفضلوا سهرانين لوش الصبح..
و طول اليوم كانوا يفضلوا قاعدين مكانهم وكل شوية طلبات طلبات، وكإن بهيرة هي اللي شغالة عندهم..
وكل ده كوم ولما كانت مريم بتتسهوك وتدلع على ادم كوم تاني.. ويخرجوا سوا لوحدهم وقال إيه نفسيتها تعبانة ومحتاجة تخرج تشم هوا..
وأم ادم كانت مبسوطة وراضية عن اللي بيحصل.. وكل ما كانت بهيرة تحاول تشتكيلها وتقولها ما يصحش كانت حماتها تغلطها وتقولها إنتي جاية من بيئة متخلفة وعايزة تحبسي جوزك جنبك لحد ما يزهق منك .. انتى كده بتطفشيه من عمايلك .. وبعدين دول خارجين يشموا هوا .. هو إنتي غاوية نكد ليه؟ ولا غيرة بنات فارغة
بهيرة قالتلها
يعني اللي في الشارع مع ادم تشم هوا واللي في البيت لوحدها تشم كولة؟
ورغم اللي بيحصل في حياة أميرة اللي عايشة في فيلا طويلة عريضة وجوزها غني ومعيشها عيشة الأميرات فعلا، لكن كانت حركاته هو وامه غريبة اوى
مفيش راجل يقبل على مراته يخليها تقلع الحجاب عشان يفتخر بيها قدام اصحابه وعيلته..
واللي بيحصل مع بهيرة اللي اتجوزت أجمل راجل شافته في حياتها، واتجوزها برده عشان جمالها، لكن بيريّل على كل ست تعدي من قدامه، ومقضيها مع بنت خالته خروجات وفسح وسهر ولا كإنه متجوز .. الاتنين كانوا بيحسدوا أختهم شهيرة، اللي كانت بتصور أول فيلم ليها بعد ما اتجوزت المنتج اللي عجبته من أول ما شافها..
شهيرة كانت طول عمرها بتحلم تقف قدام الكاميرا، وصورها تبقى في كل مكان، وده اللي حصل من ساعة ما اتجوزت ياسين
لكن بدل ما تبقى بطلة في فيلم وتتشهر بسبب تمثيلها، أول دور ليها كان دور رقاصة،
وطبعًا شهيرة اتعرفت وبقى كل كلام الناس عليها عشان رقصها اللي كان يجنن في الفيلم..
والكل بقى يقولها يا فنانة.. وأولهم ياسين اللي كان بيعرفها على ناس كتير من الوسط الفني، ويفتخر إنها مراته، وفضل يخرج معاها في سهرات كتير كانت بتفضل قاعدة فيها لوحدها مع اصحابه،
أما هو كان بيبقى مشغول باتفاقاته معاهم .. وحصلت مرة إن واحد صاحبه اتحرش بيها ومد إيده.. وراحت بسرعة تشتكي لياسين اللي كانت فاكرة إنه هيقلب الدنيا عليه وياخد منه حق مراته..
لكن اللي حصل إن ياسين ضحك وقالها، ده عشان إنتي بقيتي مشهورة وجميلة، والكل يتمنى إنه يلمسك ويقربلك، لكن إنتي بتاعتي أنا، ومراتي أنا..
ودي حاجة متزعلكيش المفروض تكوني مبسوطة إن الناس كلها تتمناكي وتتمنى بس نظرة منك .. مش ده اللي إنتي كنتي بتحلمي بيه؟ أديني حققتهولك..
فضلت شهيرة مخبية عن إخواتها اللي بيحصل في حياتها، كانت دايمًا تقولهم إنها سعيدة والفرحة مش سايعاها، وإن أحلامها بتتحقق أخيرًا، من تصوير فيلم، لتصوير كليب، لعرض أزياء، ومكانتش ملاحقة على العروض ولا الفلوس، ده غير إن ياسين مغرقها بالفلوس والهدايا طول الوقت..
ورغم إن شهيرة كانت تبان أسعد واحدة فيهم، إلا إنها أول واحدة خسرت كل ده في وقت قصير، لما جوزها قالها إن فيه حفلة خاصة لكبار رجال الأعمال،
والحفلة هتكون في يخت خاص.. والمطلوب منها إنها تقعد معاهم وتتكلم عن الشغل وساعتها هيقولولها شبيكي لبيكي فلوسنا ملك إيديكي..
قبلت شهيرة دعوة الحفلة، وكانت متوقعة إن ساهر هيروح معاها، لكنه اعتذر وقالها إنه عنده شغل كتير ومعتمد عليها..
وراحت شهيرة اليخت، وكان فيه اتنين من رجال الأعمال، لكنهم كانوا سكرانين طينة.. وبعد 10 دقايق طلبوا منها إنها تقوم وترقصلهم..
وساعتها حست شهيرة إنها مخنوقة وعايزة تروّح.. لكن واحد منهم شدها وقالها: أنا دافع لجوزك شيء وشويات عشان يجيبك هنا، مش هتمشي غير لما ترقصي وتدلعينا احنا الاتنين وتنفذي أوامرنا
ضربته شهيرة بالقلم ولإنه كان سكران وقع من طوله، واتخضت لما فضل مكانه ما بيتحركش.. جريت بسرعة وخرجت من المكان.. وكانوا ساعتها قربوا للشط، روحت بعربيتها وهي عمالة تعيط...
ولما راحت لياسين عشان تشكيله، أول ما شافها ضربها بالقلم.. كان متعصب عليها وقالها: إنتي الظاهر نسيتي نفسك وأصلك.. ده أنا جايبك من أفقر حتة فيكي يا بلد وعملتك بني آدمه.. تقومي تكسفيني قدام صحابي وكمان كان ممكن تقتلي الراجل اللي دافع فيكي أد كده!
اتصدمت شهيرة من كلام ياسين ، قالتله: إنت راجل ديوث عشان تقبل على مراتك تروح تسهر مع ناس غريبة وترقصلهم لأ وكمان بتعاقبني عشان بحافظ على شرفي ؟ يا بجاحتك يا أخي..
ضحك ياسين وقالها: كبرتي يا شهيرة وبقيتي فنانة وليكي صوت بس اوعى تنسى ان كل ده كان بمجهودي وفلوسي انا .. و انا مش هقبل واحدة مفعوصة زيك تعلى صوتها عليا ..
وأقدر أرجعك من مطرح ما جبتك ودلوقت حالاً.. إنتي طالق، ووريني هتشتغلي إزاي مرة تانية، وآدي دقني إن وقفتي قدام كاميرا مرة تانية .. ارجعي بقى للحارة الوسخة اللي جبتك منها عشان انتى اصلا مش وش نعمة .. انتى مش شهيرة انتى بهيمة و متلقش بيكى الا الزربية اللى انتى منها ، بس ما تنسيش تودعي شهرتك والأضواء وإنتي ماشية عشان الحارة اللي جبتك منها لا فيها ماية ولا حتى نور يا حلوة..
انتى طالق طالق طالق
______________
الراوى
رجعت شهيرة بيت أبوها مرة تانية، لكن فضلت مخبية طلاقها عن إخواتها، وكان من حظها إنها قدرت تحافظ على سيغتها ومجوهراتها وكمان الفلوس اللي عملتها من شغلها.. ده غير شقة كانت مأجراها واشترت العفش بتاعها، لكن قررت تبيع العفش وتستفيد بفلوسه، عشان تقدر تشترى شقة تمليك
في نفس الوقت كانت حماة بهيرة بتودع ادم عشان لقى شغل برة مصر ومسافر و طبعا بهيرة قالت لادم انها هتروح بيت ابوها طول ماهو مسافر عشان تريح نفسها شوية من خدمة حماتها .. اللى مبتخلصش بعد ما اتاكدت ان مريم رجعت بيت اهلها والامور هديت وبقت الى حدما تمام
__________________
وعدت الايام وجه شهر رمضان و كانت أميرة حماتها عندها فى اول يوم رمضان وكانت بتحضر الاكل فى المطبخ وفجاة خرجت الصالة لقت جوزها وحماتها بيشربوا خمرة عادي، وكمان طلبلها كاس، قالتله: إنت إزاي بتشرب حاجة زى دى وكمان رمضان حرام عليك ياخى
قالها: وايه المانع، انتي ليه مقفلة كده،
بصوت واحد سكران
انتى عايزه ايه يعنى دلوقت مش فاهم ، عيشة وعيشتك فى فيلا ومستوى إجتماعي مكنتيش تحلمي بيه، لكن ما تقوليليش أعمل إيه ومعملش إيه وبعدين إنتي مش عبيطة وعارفة إني بشرب عادي..
قالتله: بقولك احنا فى رمضان وصايمين .. اتقى الله بقى شوية
ردت حماتها عليها وقالتلها: لا يا أميرة يا حبيبتي إنتي زودتيها أوي، إنتي صحيح بنت رقيقة وجميلة وساهر فضل يقنعني كتير قبل ما يتجوزك عشان أفكارك المختلفة عننا مكنتش راضية بيها لكن لحد هنا و كفاية اوى .. مش لدرجة انك تخنقينا وكل شوية ده عيب وده حرام وده ما يصحش..
انتي عايزانا نبقى تحت اؤامرك انتى ونفضل محبوسين في البيت ولا ايه؟ ولا جاية تعليمنا الادب و الدين ؟؟ لو مش عايزة تشربي معانا براحتك بس ما تحكميش علينا خليكي أوبن مايندد.. شوية يا مرمر
ردت أميرة وقالتلها: يا زين ما ربيتي يا حماتي.. أنا عرفت جوزي طالع فرفوش وأوبن مايندد لمين.. ده مش منفتح بس ده كمان ميعرفش ربنا ..
و دخلت اميرة اوضتها وهى ناوية تطلق بعد المنظر اللى شافته وهى بتلم هدومها جوزها دخل صالحها و حاول يهديها وفهمها ان ده العادى والطبيعى عندهم
______________
وصلت بهيرة لبيت أبوها، واستغربت لما لقت النور مفتوح، وكان ساعتها شهيرة حاطة ماسك على وشها وخارجة من الحمام وأول ما الاتنين شافوا بعض صرخوا في وش بعض كإنهم شافوا عفريت..
بعد ما الاتنين هديوا ضحكوا، بعد مافضلوا يبصوا لبعض كتير .. قرروا يفضفضوا ويحكوا عن العجايب اللى شافوها فى سنتين اتنين
وبدأت بهيرة تحكى اللي حصلها مع ادم وبنت خالته ، وشهيرة كمان قالتلها إنها اتطلقت، وإن ياسين كلم كل الناس اللى يعرفهم عشان محدش فيهم يرضى يشغلها معاه ..
ضحكوا الأختين اللي كانوا مفكرين إن كل واحدة فيهم متغرقة في الهنا وعايشة فى نعيم وسعادة
وبعدها كلموا أميرة أختهم في التليفون، قالتلهم إنها كويسة ولسه راجعة من خروجة بره مع جوزها وحماتها..
الاتنين بصوا لبعض وكانوا خايفين لا تكون أختهم هي كمان عايشة في مشاكل وبتخبي عليهم..
لكن صوتها كان كويس.. وقفلوا التليفون معاها وقالت شهيرة: يلا يمكن أميرة هي الوحيدة اللي حظها حلو فينا ..
ردت بهيرة وقالتلها: طيب وانتي ناوية تعملي إيه؟
قالتلها شهيرة: أنا بحمد ربنا إنك جيتي، أنا كنت شايلة هم خروجي ، الناس مستنيين إني أظهر مرة تانية عشان يصوروني ويكتبوا كام خبر عني وعن طلاقي..
وأنا كنت محتاجة أبيع عفش شقتي اللي كنت مأجراها، عشان أقدر أحط فلوسه على الفلوس اللي معايا وأشوفلي شقة تمليك وأشتريها..
ردت بهيرة وقالتلها: متشيليش هم ، إديني العنوان والمفتاح .. وقوليلي على اسم المعرض اللي انتي كنتي شارية منه العفش بتاعك، وأنا هظبط كل حاجة..
وتاني يوم خرجت بهيرة وأجرت كام عربية وكام عامل عشان يفضوا الشقة والعفش، وراحت على معرض موبيليا كبير كان قريب من بيتها هي و ادم ، وكانوا مجهزين شقتهم من عنده قبل الجواز ، وأول ما صاحب المعرض شافها رحب بيها وقالها: إيه هو العفش معجبكيش؟
قالتله: عفش إيه؟ ده أنا جاية أبيعلك عفش أختي اللى كانت شارياه من عندك..
قالها: لأ أنا أقصد العفش الجديد اللي دكتور ادم طلبه من يومين، أنا بعتلك الصور بتاعته معاه، وخلال يومين هبعتهولك على الشقة زي ما اتفقت معاه ..
عقل بهيرة بدأ يلف .. وبدأت تكلم نفسها .. ازاى شارى عفش وهو مأكد عليا انه سافر ؟؟! وبعد ما اتأكدت من صاحب المعرض إن ادم جوزها بيجهز فرش شقة جديدة،
خافت لا يكون اللي في بالها حصل .. وراحت البيت لقت كل الشقة فاضية، ولقت حماتها بتقولها:
إنتي إيه اللي جابك يا بهيرة؟ مش قولتى انك هترتاحى فى بيت اهلك شوية من خدمتى واتبطرتى على عيشتك
قالتلها بقولك يا حماتى ايه اللى فضى بيتى كده ياريت تردى عليا؟!
سكتت حماتها ومبقتش عارفة ترد
اتعصبت بهيرة وقالتلها : بقولك خير يا حماتي؟ انتى فضيتى الشقة ليه؟ ويا ترى ادم عارف كده ؟؟
قالتلها: ده بيتي أنا وأنا اللي أقول مين يمشي ومين يقعد، وإتفضلي بقا من غير مطرود..
وقبل ما حماتها تكمل كلام ، كل اللي كانت بتشك فيه حصل قدام عينيها، لما دخل فجاة قصادها ادم وهو ماسك ايد مريم وبيضحكوا، وساعة ما شافوا بهيرة وقفوا متسمرين مكانهم..
وبدل ما تتعصب أو تمسح بيهم الأرض زي ما كان في نفسها تعمل ... بعد ما اكتشفت كدب وخيانة جوزها
قررت تضحك في وشهم وتقولهم مبروك .. وقالت لادم قبل ما تمشي: ما تنساش تبقى تطلقني، أصل خبطتين في الراس توجع..
ولمت بهيرة شنطة هدومها، وركبت تاكسي وقالتله يوصلها لحد بيت أبوها
والظاهر إن بهيرة كانت بتراهن على الحصان الخسران، عشان ادم جوزها لا كان بيهش ولا بينش، وكان واضح انه مجرد قطعة شطرنج بتحركها امه
خرجت بهيرة وهي بتحلف لتربي ادم وأمه على اللعبة اللى لعبوها عليها و قررت ترد القلم قلمين ... راحت المعرض عشان تجيب بقية فلوس عفش أختها اللي باعته، وساعتها وهي قاعدة شمت ريحة وحشة أوي .. قالت لصاحب المعرض: هي ايه الريحة دي، وجاية منين؟
قالها: لا مؤاخذة يا مدام بهيرة بس جالنا عفش من كام يوم ريحته زي الزفت، وفيه حشرة كل شوية تطلع ريحة زي دي، دعيت على صاحبه وحاولت أحرقه وبرده مفيش فايدة..
ساعتها جات لبهيرة فكرة متخطرتش على بال العفريت.. وكانت هتضرب بيها عصفورين بحجر ..
______________________
أميرة كانت لسه بتعاني مع حماتها، اللي عملت فيها فصل طلع من نفوخها..
دخلت أميرة على دولابها بعد ما قررت تلبس الحجاب مرة تانية، وتبدأ تصلى .. اصلها من وقت ما شافت الفلوس والغنى نسيت الصلاة و كانت بعيدة جدا عن ربنا .. وساعتها قررت تطلع كل هدومها اللي بكُم ، وطرحها ولبسها الواسع بس كل ما اميرة تدور على هدومها المحتشمة مكنتش بتلاقيها .. خرجت وهي متضايقة و هى بتسال حماتها على الهدوم
لقت حماتها بتقولها:
سوري يا أميرة، لكن هدوم الشغالين دي أنا ولعت فيهم من بعد أخر مرة اشتريتلك لبس، قلت إنك مش هتحتاجي الهلاهيل دي مرة تانية. .
حلفت أميرة إنها هتعلم حماتها درس ما تنساهوش، وتخليها تلبس الهلاهيل اللي مكنتش عاجباها دي غصب عنها..
ودخلت أميرة أوضة حماتها ، ومسكت هدومها ورشت فيها بودرة العفريت.. وراحت على الاسشوار اللي كانت حماتها بتعمل بيه شعرها، وحطت فيه كريم مزيل للشعر..
وخرجت وهي بتقول فى سرها ومبسوطة اوى : ابقى وريني بقا يا حماتي لبس الهلاهيل اللي مش عاجبك ده، إن مالبستيش غيره ما أبقاش أنا أميرة..
وتاني يوم كانت حماتها خارجة من الدش ورايحة فرح ناس قرابيها مهمين اوى فى البلد ، لبست الهدوم، لكن فضلت تهرش على خفيف ... ومكانتش فاهمة فيه إيه.. فضلت تغير في الهدوم وكانت بتموت من الألم.. وبعدها مسكت الاسشوار وعملت بيه شعرها، وفجأة لقت فيه كريم على الشعر، استغربت وبقت تمسحه لحد ما لقت شعرها بيقع في ايديها ومبقاش فيه ولا شعرايه بتبص كويس فى المراية لقت نفسها قرعة..
طلعت حماة أميرة من الأوضة وهي بتصرخ وماسكة خصل شعرها في ايديها، وبالإيد التانية بتهرش في جسمها، أميرة كانت هتموت من الضحك.. وساهر مكانش فاهم أمه بتعمل كده ليه..
وخدها وراح بيها للدكتور..
شافتهم أميرة وهم خارجين ومنظرهم يفطس من الضحك، وقالت:
صحيح ياما ناس لابسة بس قليلة الرباية، وأنا هعلمك إزاي تتريقي على لبسي، وحشمتي، وإن بان شبر منك بعد كده ما أبقاش أنا أميرة..
وبعد 3 ساعات رجعت حماة أميرة وساهر جوزها، كانت لابسة بونيه على راسها، ومغطية نفسها من ساسها لراسها..
ساهر قال
: الدكتور قال إن ماما لازم تفضل تدهن المراهم دي، وما تتعرضش للشمس خالص ولا جلدها يبان عشان ممكن الإصابة تتضاعف..
قالتلها: ألف سلامة يا حماتي.. ابقي فكريني أنزل معاكي بكرة نشتريلك هدوم جديدة طويلة وحشمة عشان للأسف كل اللبس اللي عندك عريان وهنضطر نرمى الهلاهيل دى على جنب لحد ما تخفي كده إن شاء الله ..
كانت أميرة كاتمة الضحكة بالعافية، وحماتها مش طايقة نفسها من اللي حصلها..
****
أخدت شهيرة فلوس العفش اللي اتباعت وكانت نازلة مشوار للبنك، وهناك قابلت واحد شغال في البنك اسمه محمود.. هو اللي كان بيخلصلها الورق بتاعها.
وهي قاعدة فيه واحد من زمايل محمود في الشغل اتعرف على شهيرة، وبعدها كان بيبصلها ويغمزلها، وراح وقف جنبها وقالها: الفنانة شهيرة؟
ساعتها قالت وهي متضايقة: أيوة أنا..
قالها: ممكن أتصور معاكي؟
وقبل ما ترد شهيرة أو توافق، لقت الموظف ده بيقرب منها وبيحط إيده عليها ويحضنها عشان يتصور معاها.. محمود لاحظ إنها متضايقة، وقام وقال لزميله: ما يصحش اللي بيحصل ده، التاني رد عليه وقاله: فى إيه يا عم محمود ما تسيبنا في حالنا، ولا إنت عايز القمر ده ليك لوحدك.. اتعصب محمود وبص لشهيرة وقالها: إحنا آسفين جدا يا فندم ثانية واحدة..
وأخد محمود زميله على جنب، وفضلوا يتكلموا سوا، وبعدها أخد محمود موبايله ومسح الصورة اللي أخدها مع شهيرة، ورجع لمكتبه وقال لشهيرة
أنا آسف بالنيابة عن زميلي عن اللي حصل.. مش معنى إنك فنانة وشخصية عامة إن يبقى لحد الحق إنه يقرب منك بالشكل ده أو يتصور معاكي من غير رغبتك..
شهيرة مكنتش مصدقة إن فيه راجل زي محمود لسه موجود على وش الأرض.. بعد ما كان ياسين جوزها بيخليها تلبس المحزق والملزق والعريان ويعزم صحابه عشان يسهروا ويقعدوا معاها، دلوقت راجل متعرفوش حتى يدافع عنها بالشكل ده ويبقى غيران عليها ومتضايق عشانها..
شكرته شهيرة وأخدت الورق وقالتله: أنا مبسوطة إني قابلت حد زيك، اللي زيك ماتوا في الحرب..
ضحك محمود وقالها: أنا اللي سعيد إني شفتك على الحقيقة، لإنك مش زي ما بتطلعي في التلفزيون خالص..
استغربت شهيرة من كلامه، وقالتله إزاي؟
لكن كان فى طابور واقف وراها وشغل كتير ورا محمود، فقالها: ده موضوع طويل ولو مش يضايقك وحابة تعرفيه ممكن نبقى نتكلم فيه بس بره الشغل..
ابتسمت شهيرة وأخدت منه الكارت بتاعه، ومشيت..
____________
لما روحت شهيرة لقت بهيرة عمالة تتكلم في التليفون وتضحك..
سألتها: إيه اللي بيضحكك أوي كده؟
ردت بهيرة وقالتلها: أصل أنا اتطلقت، و ادم هيتجوز النهاردة.. و طبعا هيتجوز بنت خالته اللى قلتلك انى شاكة فيها بتحوم عليه
استغربت شهيرة من فرحة بهيرة بطلاقها وقالتلها: وإيه اللي يخليكي مبسوطة أوي كده؟
ردت بهيرة وقالتلها: لازم أنبسط طبعًا، ده ادم هيشوف أيام.. ولا لأ مش هيشوف، ده هيشم أيام لحد ما يفقد حاسة الشم..
استغربت شهيرة وقالت لأختها: انتي اتجننتي ولا إيه؟ إيه اللي بتقوليه ده أنا مش فاهمة منك حاجة!
ردت بهيرة وقالتلها: أصل هقولك، لما رحت أبيع العفش بتاعك، لقيت العفش اللي ادم كان موصي عليه للسنيورة بنت خالته، قمت طلبت من صاحب المعرض طلب بسيط صغنتوت ودفعتله حلاوته لو نفذ طلبي..
وبعدها بعتت رسالة لادم وقلتله: مبروك عليك جوازك من مريم المعفنة، بكرة تكتشف عفنتها ونتنتها بنفسك ..
نسيت أقولك إني قابلت طليقها بالصدفة وكان بيواسيني عشان انت كمان طلقتني وهتتجوزها قمت سألته هو طلقها ليه، قالي إنها مكنتش بتستحمى .. الله يكون في عونك يا ادم، أنا بقولك من دلوقت الجوازة اللي يجيلك منها الريح، فركشها واستريح. .
بصت شهيرة لبهيرة اللي لسه بتضحك وقالتلها: انتي بتهزري؟ وبعدين ادم قالك إيه؟
قالتلها بهيرة: رد بعلامات استفهام.. لانه عريس ومش فاضى يرد
سألتها شهيرة: طب وانتي عملتي إيه في عفشهم؟
ضحكت بهيرة وقالتلها: ولا حاجة كل الحكاية إني حطيتلهم شوية حشرات بتعمل ريحة وحشة في الموبيليا والخشب، ده غير إنها بتلزق وبتفضل ريحتها موجودة بالأيام.. كمان وصيت صاحب المعرض ينقيلنا كام كيلو فسيخ ريحته ولا القبر.. ويخبيهم جوه في مواسير الستاير.. وساعدته وجبت كام كيلو سردين مخصوص ع حسابى و عبيت مواسير الستاير وقفلت عليهم وعملت معاهم احلى واجب
ردت شهيرة وقالت: يخربيتك دانتى دماغك يم كنتى فين قبل ما اتطلقك يا مصيبة انتى ، ده إنتي هتدمريلهم حاسة الشم.
ضحكت بهيرة وقالتلها: يستاهلوا، وخصوصًا حماتي الحرباية اللي فضلت تزن على ادم عشان يتجوز بنت أختها، قال ايه يضحكوا عليا ويقولولى انه مسافر فى شغل وهو يفضل يقولى هتوحشينى .. وحشه قرد البعيد ... يلا خليها تشربها بقا..
المهم إنتي قوليلي عملتي إيه في فلوسك؟
شهيرة: وديتهم البنك .. فكرتيني لازم أقوم أعمل مكالمة مهمة..
بهيرة: ماشي يا ستي.. وأنا كمان على فكرة نازلة بكرة شغل جديد .. خلصي مكالمتك وتعالي عشان هنكلم أميرة واجب بقا نقولها على اللي حصل، البت فاكرانا عايشين في الهنا، ومتعرفش اننا اتطلقنا..
شهيرة: طيب اطلبيها على ما آجي..
_________________
كان يوم جمعة، وأميرة بدأت تقرب من ربنا والغشاوة اللى كانت على عينيها من كتر حبها الفلوس بدأت تختفى وتبان لها حاجات مكنتش فاهمها لما كانت واقفة بتصلي في الأوضة، وبعدها لقت جوزها ساهر قاعد بيلعب على الموبايل ومطنش قالتله:
جرى إيه يا ساهر، إنت هتفضل كده؟ ده إحنا من ساعة ما رجعنا من شهر العسل وإنت ما ركعتهاش.. وكل شوية بدعيلك وأقول بكرة ربنا يهديه، بكرة يرجع عن الحرام ويصلي.. لكن مفيش فايدة! ولا يكونش الأغنيا ما بيصلوش ومش محتاجين للصلاة؟
ضحك ساهر وقالها: أنا ما ينفعش أصلي يا أميرة، مسألتيش نفسك أنا ليه ما بصليش؟ الغلط عليكي مش عليا.. ولا حتى يوم جوازنا سألتي نفسك ليه بتجوزك عند محامي مش عند مأذون؟
إنتي كل اللى كان همك الفيلا اللي هتتجوزى فيها والعربية اللي هتركبيها والعيلة اللي هتناسبيها والشركة اللي هتجيبلك مصروف أد كده كل أول شهر.. الفلوس كانت عامية عينك عن حاجات كتير و كل ده خلاكي ما تبصيش حتى في عقد جوازنا كويس وتعرفي إني مش مسلم زيك..
اتصدمت أميرة، وقالتله: يعني إيه، وإيه الهزار البايخ ده.. لكن ساهر مكانش بيهزر.. وكان بيتكلم بجد، وخرج عقد جوازهم وقالها: بصيله كويس.. مخدتيش بالك فعلا؟ ولا من الشرب، ولا من لبسي ولبس أمي؟ ولا من نمط حياتنا؟
انا مليش دعوة انك كنتى بعيدة عن ربك ومش بتصلى ولما جيتى تصلى كنتى فكرانى زيك
أنا كنت مستحملك طول الوقت اللي فات بس قلت إني هقدر أغيرك.. لكن إنتي متخلفة ومعقدة.. متمسكة بالحجاب ومتمسكة بتقاليد غريبة.. وعادات وديانات غير ديانتى
فضلت أميرة تتكلم مع ساهر وهي حاسة انها دايخة و شايفه إن الحلم اتقلب لكابوس، لا مش كابوس وبس دى حاسة ان الارض اتشقت و بلعتها
وبعد زيارتها للمحامي مع ساهر، اتطلقت أميرة هي كمان.. وهى راجعة نفس الستات اللى كانوا فى فرحها
كانوا واقفين مع بعض تحت البيت وشافوا التلات بنات لما اتطلقوا ورجعوا بيت اهلهم ... واحدة فيهم قالت للتانية
ارتاحتى دلوقت لما عينك جبتهم الارض والتلاتة ملحقوش يعنى يفرحوا اهم اتطلقوا وهما لسه مكملوش ٢٧ سنة .. هما بقى ولا بنت اللى عدت التلاتين بس لسه معززة مكرمة ومحدش هانها ..
السن ملوش علاقة يا جمالات اللى عمل فيهم كده طمعهم وأحلامهم اللى كانت مش مناسبة ليهم .. كان كل همهم يطلعوا من عيشتهم و يتبروا من اصلهم
يلا ربنا يعوضهم خير واكيد هما خدوا درس عمرهم ما هينسوه
وقبل ما تدخل بيت أبوها لقت إخواتها بيرنوا عليها، فتحت الباب لقتهم هم الاتنين قاعدين جوا.. ولما لقوها داخلة عليهم بشنطة هدومها فهموا اللى حصل و اترمت اميرة في حضنهم وقالتلهم:
كل حاجة كنت بفكر فيها طلعت غلط.. كل حاجة كنت بحلم بيها و عايزاها طلعت مقلب كبير
قعدوا الاخوات التلاتة أميرة وبهيرة وشهيرة..
كل واحدة لأول مرة حكت حكايتها كلها زي ما حصلت، ومحاولتش تجمّل فيها..
ورغم اللي حصلهم إلا إنهم كانوا بيضحكوا على نفسهم.. وعلى الحرب اللى كانت بينهم وبين حمواتهم الأراشنات
بهيرة نزلت شغلها مرة تانية، وكملت من مطرح ما فاتها..
وسمعت إن ادم طلق مريم مراته عشان الريحة الوحشة اللى فضلت موجودة في الشقة
وكل ما كان يقرب منها كان يشم ريحة وحشة ويفتكر رسالة بهيرة ويهرب من مريم ويروح لأمه، لكن أمه هي كمان مقدرتش تستحمل بنت أختها، والجوازة باظت..
و ادم اتصل ببهيرة مرة تانية وحاول يترجاها عشان ترجعله ويردها قبل ما عدتهم تخلص.. لكن بهيرة قابلت راجل تاني في الشغل.. مكانش فيه أي حاجة تبهر.. لا شكله وسيم، ولا حتى غني ولا البنات بتلف حواليه وتجري وراه.. مجرد انسان بسيط لكنه رجل عصامى بنى نفسه بنفسه وبيحب يعتمد على نفسه فى كل حاجة
وأول لما اتكلم معاها وطلب إيدها عرفت إنها هتعيش معاه وهي مرتاحة البال وسعيدة.. لإنها مش بتجري وراه عشان شكله وإنه بيبهرها..
أما أميرة ففضلت أيام قاعدة في البيت، ومش مصدقه اللى حصل معاها .. لكن اكتشفت إنها كانت بتبص للدنيا غلط، وكانت طول الوقت مستنية الأمير اللي هيحققلها أحلامها، بغض النظر عن اى اخلاق او دين او حتى عادات وتقاليد مكانتش تعرف إنها ممكن تحقق ده لنفسها..
وعشان كده نزلت تدور على شغل.. والغريبة إنها وهي بتدور على شغل فى محل قابلها واحد وقالها إن ذوقها في اللبس يجنن، واقترح عليها إنها تفتح براند للمحجبات، وإنها تدير خط الإنتاج خاص بيها .. ولأول مرة أميرة لقت نفسها في الشغل .. وكمان لقت الراجل اللي أول حاجة عجبته فيها حشمتها وتدينها..
أما شهيرة فكانت بتتعرف على محمود، اللي شافته في البنك ووقعت في حب تصرفاته من أول لحظة.. ولقت فيه كل حاجة كانت مفتقداها في جوازها من ياسين ..
لقت محمود راجل بمعنى الكلمة، بيخاف عليها وبيصونها، وبيساعدها عشان تحقق حلمها، لكن المرادي شجعها إنها ترجع تدرس وتدخل كلية الإعلام عشان تقدر تبقى مذيعة وتقدم حاجة للناس تنفعهم..
نفس البيت ونفس الإخوات، والنهاردة عيد ميلادهم ال 27 كان فى رمضان المرة دى واتجمعوا البنات بعد الفطار وهما ليتفرجوا ع الفوازير وبيفتكروا الايام الجميلة سوا .. وهما بيقولوا الله على اللمة الحلوة و ايام زمان و القعدة اللى ترد الروح تسوى الدنيا واللى فيها طز فى الفلوس والوسامة والشهرة ان مكنتش تحسينا بالبيت الدافى والموده والرحمة اللى ربنا سبحانه و تعالى قال عليهم
.. ووقت صلاة التراويح قاموا التلاتة صلوا كلهم و كل واحدة فيهم اتمنت أمنية، لكن المرادي عارفين هما المفروض يختاروا إيه في حياتهم..
أميرة اختارت إنها تعتمد على نفسها، وتلاقي راجل جنبها وبيحترمها وبيشجعها تحقق حلمها.. لكنها مش مستنية إنه هو اللي يحقق حلمها
أما بهيرة فاتمنت إن ربنا يكملها حملها على خير، وتفضل مبسوطة مع جوزها اللي كل حاجة فيه بتعرفها قيمته، وعلمتها إنها مش المفروض تاخد بالشكل.
أما شهيرة، هي ومحمود هيكتبوا كتابهم بعد كام يوم، وإمتحاناتها قربت، لكنها قدرت تفتح قناة على يوتيوب وبتقدم فيها محتوى هادف .. وعرفت إن الشهرة والمظاهر والفلوس مش هدف، لكن دلوقت بقى هدفها الحقيقي إنها تخدم الناس، وتتعرف بحاجة كويسة تفتخر بيها العمر كله.
الجواز مش شهرة وفلوس ووسامة لازم تختاروا الراجل اللى يعرف ربنا بجد ... يوصونكم ويخاف عليكم ويحفظكم ... وتكون اخلاقه ودينه اهم بكتير من فلوسه ووسامته
ودي كانت حكاية أميرة وبهيرة وشهيرة.. اللي حققوا اللي بيتمنوه فعلا .. بس اللي ربنا كان كاتبه ليهم كان أحسن بكتير من أي حاجة خطرت على بالهم.. عشان كده مش لازم كل حلم يتحقق عشان اوقات الاحلام مش بتكون مناسبة لينا .. ولما بتحقق بتكون هتضرنا اكتر ما هتنفعنا .. عشان كده دايما ندعى باللى فيه خير لينا ونسيب ربنا يختارلنا و مش دايما اللى بنحلم بيه لازم يحصل احيانا لما بنسيبها على الله .. بتكون اختيارات ربنا احلى و اجمل بكتير من اللى بنتمناه .. قال الله سبحانه وتعالى فى كتابه الكريم و يدعو الانسان بالشر دعائه بالخير .. وكان الإنسان عجولا .. صدق الله العظيم
تعليقات
إرسال تعليق