اتجوز جارتى وكسرنى بعد حب سنين وعشرة على الحلوة والمرة والنهاية كارثة بكل المقاييس !!
بقا معقولة مش هقدر اخلف غير بعد العملية....طب اجيب مصاريفها منين واعمل ايه بس يااارب....ده كشف الدكتور لوحده خد منى مرتب شهر .... ياريتني ما جيت ولا عرفت حاجة ... ياارب صبرني ياااارب ... يارب قويني يااااارب
انا امل ٣٨ سنة قصتى بدات من وقت ما اتجوزت على ... عيشت وجع و
حياة صعبة 8 سنين كاملين .. حماتي تبقى خالتى زمان قبل الجواز كانت بتحبنى اوى
وكانت تتمنانى لابنها لكن من وقت ما خلفت سما بنتى و هى اتقلبت عليا ٣٦٠ درجة و من
وقتها كل شوية تقولي مش هنشوفلك حتة عيل انا عايزة ولد يتسند عليه ابني لما
يكبر...ويقف ف ضهره
الاول كنت بسمعها و اسكت واعدى لكن لما زودتها اوى معايا فى الكلام
بقيت ارد واقولها ...انا مش معيوبة وانتى عارفة الكلام ده والدليل اني خلفت سما
عادى .. واكيد عارفة كمان ان اللى بيحدد نوع الجنين يا حماتى هو الراجل مش الست
يعنى الحمد لله انا سليمة
ترد تقولى يا زين ما جبتى يا حبيبتى واحنا خدنا ايه من البنات ان
شاءالله وخلفتهم غير وجع القلب والهم انا عايزة راجل يقف ف ضهري وضهر ابني
كلامها نرفزنى اوى وقلتلها بعصبية .. مالهم البنات ما انا واقفة ف
ضهر ابنك اهو كنت اشتيكت ليكي فى حاجة .. حامدة ربنا على كل حال و اى عيشة معاه
وكعادتها لما ميعجبهاش الكلام تعوج بقها وتسيبني وتمشي وبسبب
كلامها بدأت افكر ف حل...انا ليه مخلفتش من بعد سما... و يا تري ايه المشكلة وانا
مش باخد أى موانع حمل
وف يوم وانا شغالة ف محل الهدوم اللى بشتغل فيه...سمعت واحدة
بتتكلم مع صاحبة المحل عن دكتور نسا و أد ايه هو شاطر وانها مكنتش بتخلف ومن بعد
المتابعة معاه بقت حامل وربنا كرمها بتؤام
وبعد ما خلصوا كلام خدت من صاحبة المحل اسم الدكتور وعنوانه ...
فكرت وقولت ما تروحي يا بت يا امل وتجربي حظك وتعرفى العيب فين
...
وفعلا قررت اروحله بس من غير ما اعرف حد ... ولما وصلت هناك خدت
اول صدمة لما عرفت ان تمن الكشف 1500ج
ايه كل ده بس ... يااارب ... ده مرتب شهر كامل بس مش مهم هدفعهم واعرف المشكلة فين
.. عشان اريح حماتى و اسكت لسانها المبرد ده
دفعتهم واستنيت دوري ودخلت للدكتور وياريتني ما دخلت كشف عليا من
غير ما ينطق كلمة و بعدها قالي واضح انك عندك تكيسات علي الرحم ومحتاجة عملية
هتتكلف عشر الاف جينه واول ما تعمليها هتقدري تخلفي عالطول
ودي كانت صدمتي التانية عملية وبالمبلغ ده اجيبهم منين ياارب .. طب
يا دكتور مفيش اى حل او علاج يكون سعره اقل شوية .. للاسف يا مدام أمل مفيش حل غير
العملية
قولتله بكسرة وانا مش قادرة ارفع رأسي.. طب مينفعش نقسط فلوس
العملية وانا والله هدفعهم كلهم
بصلي وقالي انا اسف يا مدام والله بس للاسف مينفعش
رديت وقولت كتر خيرك ي دكتور وخدت بعضي ومشيت
مشيت وانا مكسورة وقلبي بيوجعني و بكلم نفسى طب هعمل ايه مع حماتي
وعلي واتصرف ازاي دبرني ياااااارب
روحت علي بيتي وانا نفسي مكسورة....وياريتني ما روحت دخلت لقيت
حماتي قاعدة ومعاها واحدة و بنتها ... انا عارفة انهم جيراننا فى الشارع لكن ياترى
جايين ليه
دخلت سلمت و قلت السلام عليكم ازيك يا خالتى وازيك يا عفاف ..
ردوا عليا من غير نفس وقالوا بخير
يا اختي
ولسه هقول منورنا والله
لقيت عفاف الحرباية بتنطق وتقول : انا معنديش مشكلة اتجوز علي وان
شاء الله اجيبلك الولد اللى نفسك فيه
اتصدمت واد ايه وجواز ايه ... انا ناقصة صدمات جديدة .. ليه الوجع
ده كله يااارب هلاقيها منين ولا منين
لقيت نفسي بزعق واقول....جواز ايه ياختي يا بايرة انتي ياللي محدش
معبرك...اطلعي بره انتى وهي وبكل عصبية وصوت عالي قولت برررررررره
حماتي ادام عصبيتي مقدرتش تنطق...وهما طلعوا جريوا دخلت اوضتي و
قعدت مع نفسى و سرحت وقتها افتكرت كل حاجة من يوم اتولدت لحد انهارده
لما كنت صغيرة اهلي كانوا شايفين انه تعليم البنت ملهوش أى لازمة
... و انت البنت مهما اتعلمت مضيرها لبيتها وجوزها و تربية ولادها .. فى بلدنا هنا
مكنش فى بنت بتكمل بعد الدبلوم .. فقرروا اني اسيب تعليمي واتعلم شغل البيت عشان
انفع و ابقى ست بيت شاطرة و اتجوز
ولما كملت 24سنة لقيت أمي بتقولي جايلك عريس يا بت يا أمل وعريس
ايه ميترفضش ومش هيكون عندك حما زى باقى الحموات وهتعيشي مرتاحة
أول ما قالت كده فهمت أنه علي ابن خالتي وطبعا البنت ملهاش رأي فى
بلدنا ولازم اوافق عالطول ... وفعلا وافقت واتجوزنا كل حاجة حصلت بسرعة كبيرة
ملحقتش احس بأي حاجة ولا الخطوبة ولا اى حاجه فجاءة لقيت نفسي معاه وبقيت مراته
علي .. راجل طيب مش هنكر اني بحبه ولا اني عايشة معاه مرتاحة بس
عيبه الوحيد انه ماشي ورا كلام امه ومش بيزعلها ابدا
بعد سنتين من جوزانا خلفت بنتي سما وبعدها عالطول أمي ماتت اللى
كانت مصبراني علي كل حاجة ف الدنيا ماتت .. راحت وسيبتني لوحدي .. صرخت عيطت سعتها
الدنيا اسودت فى وشى
ليه يا أمي سيبتني ليه....ااااااه فراقك صعب اوي يا غالية من بعدك
مبقاش ليا حد...يومها خالتي خدتني ف حضنها وقالتلي انا معاكي ي بنتى وعمري ما
هسيبك واحطك جوه عنيا
دخلت ف حضنها و بكيت وقولت الغالية راحت ي خالتي دنيتي كلها
راحت... فضلت ف حضنها اعيط ليلتها لحد ما نمت
بعدها بكام شهر لقيت خالتي بتطلب منى طلب غريب ... قالتلى ادور علي
شغل عشان اساعد علي ف المصاريف. .. مع ان ده فى بلدنا عيب اوى والست عندنا اللى
تخرج من بيتها عشان تشتغل يبقى جوزها مش راجل
بس انا وافقت عالطول عشان كنت عارفة ظروف جوزى و قلت مفهاش حاجة
لما اساعده ده مهما كانت جوزى وابن خالتى ويحبه وفضلت ادور لحد ما لقيت شغل ف محل
الهدوم اللى شغاله فيه دلوقت
واستمرت حياتنا علي كده وسما بقا عندها ست سنين وخالتي معندهاش غير
كلمة واحدة على لسانها المؤذى .. هنشوف الواد امتى وهتجيبه ولى العهد امتى اللى
هيفرح قلبى
فقت من شرودى و سرحانى فى الماضى الأليم لما سمعت صوت علي بينادى
عليا .. فعملت نفسي نايمة لأنه فعلا اليوم مش مستحمل صدمات تانية
ومن بعد اليوم ده بقيت كل ما ارجع البيت القي خالتي معاها بنات
وستات ما هي قاعدة بتختار عروسة لابنها من غير ما تعمل اى حساب لمشاعري ولا اى
اهتمام
بس انا كنت واثقة ف علي وانه عمره ما هيعمل فيا كده لانى كنت عارفة
انه بيحبنى زى ما بحبه واستمرت حياتنا علي كده .. لحد ما ف يوم قلت لعلى انى عندى ضغط
شغل و احتمال اتاخر لبليل .. بس بعد نص شاعة حسيت بدوخة و مقدرتش اكمل و استاذنت
من صاحبة المخل و روحت .. دخلت البيت لقيت الدنيا هادية اووي حمدت ربنا انه
معندناش حد ودخلت اوضتي علشان ارتاح وهنا كانت اكبر صدمة ليا .. جوزي وف حضنه
واحدة تانية وعلي سريري....وجع صعب اوووي وكسرة قلب مش عادية
اول ما شوفتهم محستش بنفسى غير وانا بصرخ صرخت وقولت ليه يا علي
كده ... انا عملت فى ايه عشان تخوننى فى اوضتي و على سريري
لقيته بيقولي...اهدي يا أمل .. اهدى عشان لازم تتقلبى الوضع الجديد
و تعرفى ان دى ليها حق فيا زيك بظبط .. قلتله حق ايه ان شاء الله و من دى فهمنى
قالى ببرود شديد دي مراتي علي سنة الله ورسوله
مراتك و بتقولها بمنتهى البساطة كده فى وشى يا جحودك يا جبروتك يا
اخي...وقدرت تقولها ازاى .. انت بجح بشكل هانت عليك العشرة والعيش والملح .. بقى تمشى ورا كلام
امك وتبيعنى وتجرح قلبى ليه دانا عمرى كله ضاع عليك و ضحبت كتير عشانك
لقيت خالتي داخلة وبتقول جرا ايه يا أمل معرفتيش تجيبي الواد يبقي
هي هتجيبه ... ايه يزعلك فى كده طالما كله بالحلال
بصيتلها باستحقار و مسحت دموعى و مسكت اعصابى وقولتلها صح يا خالتي
هي هتجيبه بس انا عايزة أسألك سؤال بقي هي دي وصية أمى ليكى يا اخت امى يا لحمى و
دمى ...بقا هو ده الوعد اللى وعدتهولى انك هتكوني امي التانية و تعوضينى فقدان
أخرى
يا خسارة يا خالتي يا خسارة بس انا عمري ما هسمحك ولا اسامح ابنك
ابدا
وقتها طلبت الطلاق وقولتله طلقيني ي علي
رد بحزن و قالى لاء يا أمل انا مقدرش اعيش من غيرك ولا اسيبك ابدا
بصيتله و قلتله قدرت يا على وبعتني ... بعتيني بالرخيص بعدما
اشتيرتك بالغالي .. ولو عندك ذرة رجولة واحدة طلقيني حالا
بصلي بعصبية وقالي تقصدى ايه يا أمل
رديت قلتله قصدي اللى انت فهمته يا علي .. انت نزلت من نظري ومن
الاخر كده انا شايفاك مش راجل
قالى بقى كده يا أمل طب انتى طالق
وقفت ادامهم بكل قوه ودخلت خدت بنتي ولميت حاجاتي ومشيت
روحت شقة امي اللي كانت عبارة عن اوضة واحدة وصالة
دخلت ونيمت سما وفضلت ابكي طول الليل ببكي علي عمري اللى راح مع
واحد كنت فاكراه سندى فى الدنيا بعد ربنا طلع ميستهلش كل اللى عملته عشانه و خالة
من لحمى و دمى باعتني عند أول محطة عشان افكار عقيمة فى دماغهم اللى متقدرش تجيب
الولد تبقى ارض بور ولازم يركنوها و يجيبوا غيرها ... كأنهم واخدينها تجارة مش
حاسيين انى بشر من لحم و دم و بحس زيهم دول حتى معملوش حساب للعشرة والايام اللى
بينا ..
عدت الايام وانا بشتغل كل يوم اكتر من اللى قبله عشان اوفر عيشة
كويسة ليا ولبنتى وخاصة انى قدمتلها فى مدرسة ومصاريفها كترت ..
بس مع شغل البيت وضغط شغلى فى المحل ومتابعة بنتى فى المذاكرة ..
بدأت احس بدوخة بتجيلى باستمرار .. الاول كنت بطنش واقول يمكن من كتر الارهاق والشغل
..
بس لما زادت الدوخة و بقت تجيلى كل شوية رحت للدكتور وقالى اسعد
خبر سمعته فى حياتى مكنتش مصدقاه ...
قالى انى حامل فى الشهر التالت .. فرحت اوى وقتها و سجدت شكر لله
وقلت ياما انت كريم يارب .. كان نفسى الدنيا كلها تعرف وتفرح معايا .. ولما افتكرت
اللى عملوه فيا حماتى و جوزى قلت خسارة فيهم يعرفوا .. وخبيت الخبر عن اى حد عشان
مايوصلهمش كلام انى حامل .. و الشهور عدت عليا وبطنى ابتدت تكبر و يظهر عليها
الحمل .. وقتها بيعت شقة امى و عزلت بلد تانية جنب بلدنا و عيشت فى شقة ايجار
.. لحد يوم الولادة وسبحان الله ..
يشاء ربنا انى اجيب ولد ..
فكرت كتير ارجع بس قلت فى عقلى بلاش يا بت ترجعيلهم و ترجعى لنارهم
دول ميستهلوش .. كفاية اللى عملوه فيكى وكنتى بتباتى ايام وليالى و فى قلبك نار من
عمايلهم و عينك بتجيب بدل الدموع دم ولا صعبتى عليهم ولا حتى هان عليه يبعت مصاريف
لبنته عشان مدرستها ..
وقررت مرجعش بولادى تانى ..وبنتى الحمد لله خلصت الابتدائية و كانت
من الاوائل .. وانا نزلت شغل فى محل و عافرت و تعبت عشان اربى ولادى احسن تربية
واعملهم احسن تعليم .. والحمد لله عايشين دلوقت مرتاحين اوى وقدرت اخد محل ايجار و
بقيت اسوق لنفسى اون لاين كمان .. بس انا ضميرى ابتدا يأنبنى اوى ... خاصة ان ابنى بقى عنده خمس سنين
و كل شوية يقولى فين بابا يا ماما .. اشمعنا بودى جارنا عنده بابا و انا لاء ...
وقتها خدته فى حضنى و بقيت عايزه اقوله بابا مسافر او حتى مات بس مهنش عليا اقولها
لانى مش قليلة الاصل و مش بيجيلى قلب اكدب على ولادى وابوهم لسه عايش على وش
الدنيا ...
تعليقات
إرسال تعليق